Kungani umKhristu kungamele akholelwe kumadlozi?

Bahle Tshoba

Ekuhambeni kwami kokukholwa, noma kungekude kangakho, lo-mbuzo uvamile ukubuzwa, ezikhathini eziningi siye simangalelwe njengalabo abalahla amasiko, kuthiwe singabalandela izindlela zabamhlophe. Lokhu kungamampunge oqobo, inkolo yobukhristu akusiyo eyabantu abamhlophe, umlando okhomba lokho mningi kakhulu. Angizimisele ukugxila kakhulu emlandweni wenkolo yamaKhristu, mhlasimbe ngelinye ilanga siyokhuluma ngawo. Umbuzo engifuna ukuwuphendula namhlanje yilowo othi; kungani iNkolo yobuKhristu ingakholelwa emadlozini.

Iyini inkolo yamadlozi?

inkolo yamadlozi yinkolo yesizwe esimyama esisemazansi ne-Afrika. Kubalulekile ukuthi ngiveze ukuthi akukaze kube yinkolelo yesizwe esimnyama ukuthi umphefumulo womuntu uyabhubha nxa efa, isizwe esimpisholo besihlale njalo sikholelwa ukuthi umphefumulo uyaqhubeka uphile emva kokufa, indaba yayisekutheni; umphefumulo uyaphi uma umuntu esefile. Sizokhumbula ukuthi ngalesi sikhathi abantu besizwe esimnyama babengakaze bezwe ngendaba yezulu nesihogo, ama- missionary ayengakafiki azoshumayela ivangeli. Kanjalo-ke zabaziningi izinkolelo ezaqhamuka nabantu besizwe esimnyama ukuchaza ukuthi umphefumulo womuntu uyaphi lapho eseshonile. Enye yalezi zinkolelo kwaba yileyo yokuthi umuntu uya kwabaphansi, noma kwelamathongo. Ngokuchaza kwabo, lapha kwelamathongo ilapho kukhona yonke imindeni, umuntu-ke uthi uma eseshonile umphefumulo wakhe uyongena emndenini lapho afike khona abe ngomunye wamathongo, ngokwalenkolelo umuntu akagcini nje ngokuba kwelamathongo kodwa usakwazi ukuxhumana nalabo abasaphila emhlabeni, uma-ke exhumana nabo ubizwa ngedlozi. Kukhona-ke ngokwalenkolelo idlozi elihle, nedlozi elibi. Idlozi elihle ilelo ngokwalenkolelo eliletha izinhlanhla, lelo elibi ilelo eliletha amabhadi. Lokhu kuya ngokuthi umuntu uyalithokozisa yini idlozi lakhe, izindlela zokuthokozisa idlozi ziningi-ke ngokwalenkolelo, angizimisele ngokukhuluma ngazo kulombhalo omfishane.

Kuhle futhi ukubalula ukuthi, isizwe esimpisholo besihlale vele sikholelwa ukuthi kukhona onamandla, lo bebembiza ngokuthi “umvelinqangi”, njengoba lisho nje negama, umvelinqangi igama elichaza lowo owavela kuqala kungakaveli okunye, ukuthi unjani umvelinqangi ikhona obekuyinkinga kulesi-sizwe, ziningi izindaba abantu abaziqamba ukuchaza ukuthi ungubani umvelinqangi, ezinye zalezi zindatshana ezichaza kabanzi ngomvelinqangi sizazi njengezinganekwane namuhla, uma ngingenza isibonelo nje; bekunenkolelo yokuthi izilwane zazikhuluma kuqala, umvelinqangi efuna ukunquma ukuthi abantu baphile unomphela noma bafe wathuma intulo nonwabu, unwabu lwahamba kancane luyobika ukuthi abantu mabafe, intulo yahamba idla amahlamvu yakhohlwa ukuthi ibithunyiwe ngoba beyazi ukuthi ngeke ishiywe unwabu, kanjalo-ke unwabu lwafika kuqala, umvelinqangi wabe esenquma ukuthi abantu bafe. Enye futhi bekuyinkolelo yokuthi umvelinqangi wayincisha kanjani imbila umsila ngenxa yokuyalezela. Kwaba sobala kuma-missionary ukuthi kungaba yiphutha ukuthi babize uJehova ngomvelinqangi, kwazise ukuthi umvelinqangi kwazicacela ukuthi kwaba yisithixo isizwe esimnyama esazakhela sona ngokungaqondi, kungakho-ke kunokuthi babize uJehova ngoMvelinqangi babona kungcono ukuthi basebenzise elinye igama, uThixo noma uNkulunkulu.

Ukufika kwenkolo yokuKhristu.

Ekufikeni kwenkolo yokuKhristu kwacaca ukuthi inkolo yomdabu ibhekanana nenkulu inselelo. impela, inkolo yokuKhristu yaphonsela inkolo yesizwe esimyama inselelo, inkolelo yamaKhristu yabe iphambene ngokuphelele nenkolo yomdabu. Yebo, kusukela kwinkolelo ngabafileyo kuya kwinkolelo ngomvelinqangi, kwacaca bha ukuthi umuntu akakwazi ukukholwa ngamadlozi abe futhi engumKhristu, lezi-zinkolo zombili zazihluke kakhulu, kwakungekho kuvumelana kuzo uma kuza ezinkolelweni zazo, kwacaca ukuthi umuntu nomuntu kumele akhethe ukuthi uzimisele ngokuqhubeka ukukholelwa amadlozi noma uyayeka akholelwe kuJesu nakuNkulunkulu owavezwa ama-missionary, kwakungayona inketho ukukukholelwa kukho kokubili. Iziphi lezo zinto ezabe zixabanisa inkolelo yesizwe esimnyama neyamaKhristu?

Inkolelo ngabafayo.  

Imibhalo engcwele icacisile ngabafayo, umuntu uma efa uya eParadise noma eHayidese, ibhayibheli alinanazi ukukuveza lokhu, futhi ukuze kungaphikwa-muntu kushiwo iNkosi uJesu uqobo. Kwivangeli ngokukaLuka 16:19-31 sithola indaba yesicebi noLazaru. ULazaru wafa nesicebi safa, uLazaru wavuka eParadise esifubeni sika-Abrahama, isicebi savuka eHayidese emlilweni ovuthayo, Kuyacaca futhi ukuthi isicebi asikho emndenini kwazise isicelo saso ku ves 27-28, sicela ukuthi kuthunyelwe ukuze abakubo bangezi kulendawo esikuyo. Kuyacaca futhi ukuthi akukho kuxhumana okwenzekayo phakathi kwabafileyo nabaphilayo, lokhu sikubona kuVes 29-31, uma befuna ukuzwa ukuthi kuyashisa ehayidese abadingi ukuthi kuze kuye umuntu osuka kwabafileyo, mabalalele uMose nabaProfethi (nokungukuthi izwi elilotshiwe, kwazise Ilona elinemibhalo kaMose nabaProfethi). UPawuli uyafakaza naye kwabaseKorinte besibili isahluko 5:8, lapho echaza khona ukuthi uma singekho emzimbeni njemamaKhristu, nokungukuthi uma silala/sifa siba sekhaya ezulwini/eNkosini. 

Lokhu asikuboni kwiTestamente Elisha kuphela, kodwa neTestamente elidala liyacacisa ngakho. uMshumayeli 9:5-6 naye uveza into efanayo, abafileyo kabanasabelo, ngeke babe nakuxhumana nalabo abaphilayo.  Lezo zombili (1 abafayo abayi kwabaphansi kodwa eHayidese noma eParadise, 2 abafileyo abanakuxhumana nabaphilayo ) izinselelo ezaphonselwa inkolelo yomdabu, nezenza kwacaca ukuthi Inkolo yobukhristu ayihlobene neze nenkolelo yomdabu.

Abantu basuke bezwani/bebonani uma beba namaphupho abangasekho benza izicelo?  

Kuliphutha ukuthi siphike uma abantu bethi baba namaphupho, bebona abantu abangasekho, bekhuluma nabo futhi, asikwazi ukuziphika lezo zinto kwazise kubona ziyiqiniso kuhle kwelanga ehlobo. Okumele sizibuze khona ukuthi Lithini lona izwi ngazo lezo zinto. Singaze siye kude nje, kuhle ukuvuma ukuthi ebhayibhelini bavelile abantu abebekwazi ukukhuluma nabafileyo nabanamadlozi, kuLevitikusi 19:31, kuvelile futhi ukuthi uNkulunkulu uyanengeka ngabo (kuDuteronomi 18:10-12). Kodwa sesishilo ngenhla ukuthi uNkulunkulu uthi akekho ofileyo onokuxhumana nabaphilayo. Pho uma bekhona-ke abanedlozi, nabashaya imilozi, nabathakathi basuke bekhuluma nobani uma bengenakuxhumana nabafileyo na?

Zimbili-ke izincazelo abavame ukufika nazo abantu abanenkolo yokuthi idlozi ngumphefumulo womuntu wangempela. Incazelo yokuqala bayisusa kwindaba kaSamuweli esiyithola kwincwadi kaSamuweli wokuqala isahluko 28:3-25. Lapha sithola uSawule eya konedlozi ukuba amvusele uSamuweli, ngempela onedlozi uyamvusa uSamuweli futhi uSamuweli ukhuluma izwi lesiphrofetho kuSawule, ukufakaza ukuthi nguye ngempela uSamuweli owayekhuluma sithola uves 14-15 esiqinisekisa ukuthi kwakunguye impela owayevusiwe. Abantu-ke baye basebenzise lokhu ukuthi bathi “nakhu-nje onedlozi wakwazi ukuxhumanisa ofile nophilayo, kushukuthi bayakwazi-ke ukuxhumana nathi”, okumele sikuqaphele ngalencazelo ukuthi iqagula ukuthi izwi leNkosi liyakwazi ukuziphikisa, kodwa siyazi ukuthi aliziphikisi izwi leNkosi. Ekumele sikuqonde yilokhu; uma uNkulunkulu ebekile umgomo usuke ewubekele abantu, akusho ukuthi naye ungaphansi kwawo. Isibonelo-nje; uma ethi umuntu akangabulali ukusho ukuthi yena akanalungelo lokuthatha okungokwakhe, uyakwazi ukubulala yena ngamandla akhe (UGenesise 38:7), noma asebenzise abantu ukubulala lowo asuke efuna afe (1 kuSamuweli 15:3), kwesinye isikhathi basuke bezenzela okubi bona kodwa uNkulunkulu afezekise icebo lakhe ngabo, lokhu sakubona ngokufa kukaJesu uqobo, amaJuda eyenza isono ngokumbulala, uPetru uze athi kumele aphenduke ngoba abezojeza ngesenzo sawo (Izenzo 2:36-38), kodwa futhi siyazi ukuthi kwakunguNkulunkulu owabulala uJesu (uIsaya 53:10).

Kanjalo izwi lisivezelile ukuthi uNkulunkulu akabavumeli abafile ukuthi baphinde baphile (uIsaya 26:14), kodwa futhi uNkulunkulu uphinde wathi yena uyakwazi ukubulala nokuphilisa, uyakwazi ukuhlisela endaweni yabafileyo nokubenyusa (1 uSamuweli 2:6). Simbonile futhi evusa abaningi ekufeni, esebenzisa abaphostoli kwesinye isikhathi, uJesu wabavusa futhi abanye, nasekufeni kwakhe kwaqhephuka amathuna, bavuka abaningi ekufeni (ngokukaMathewu 27:52). UNkulunkulu uyakwazi ukwenza noma yini ayithandayo (Jeremiya 32:27, Amahubo 115:3), okucacayo kodwa ukuthi njalo uma uNkulunkulu enza into yena ashilo ukuthi akumele yenzeke kusuke kuyisimangaliso, isimangaliso-ke ngokwencazelo yaso nje into engajwayelekile, ukuthi uNkulunkulu wenza isimangaliso kanye akusho ukuthi uphoqelekile ukusiphinda, usuke esenze ngaleso sikhathi ngoba kunesidingo. Kanjalo noSawule wenza okubi eNkosini ngokukhuluma nonedlozi ukuba amvusele uSamuweli, kodwa uNkulunkulu wenza isimangaliso sakhe ukuthi avume isono sakhe sibe ngokukhuluma kwakhe, wavuma ngalolo suku ukuthi onedlozi avuse umuntu ofile okwangempela, akusho-ke ukuthi uNkulunkulu ukwenza njalo lokhu, wakwenza kanye, kwalotshwa asiphindanga sakubona futhi kwenzeka. Labo abathi namanje uNkulunkulu usakwenza ngezanusi zesimanjemanje bafanele ukukholwa ukuthi imbongolo iyakwazi futhi ukukhuluma, kwazise uNkulunkulu wake wayikhulumisa nayo kanye (kuNumeri 22:28).

Incazelo yabo yesibili ithi; UJesu ngesikhathi ekhuphukela entabeni nabafundi bakhe, kwabonakala uMose noEliya (ngokukaMathewu 17:3), basebenzisa lombhalo-ke ukuveza umbono wokuthi abafileyo bayakwazi ukubuya, kodwa uma bebuya basuke sebefana nezingelosi, bacaphuna naku Mathewu 22:30, ukuthi uma labo abafileyo sebebuya (bevusiwe) babuye sebefana nezingelosi bedlulisa umyalezo kaNkulunkulu, uma bekhuluma basuke bengakhulumi okwabo kodwa okukaNkulunkulu. Ziningi izinto ezidinga ukulungiswa ngalendlela yokucabanga, kodwa ngenxa yokuthi ngifisa singaphumi esihlokweni, ngizogxila kulokho okubalulekile. Ukuvela kuka-Mose no Elisha kuJesu kwakunesizathu, sichaziwe futhi kuMathewu 17:5 no 8, nokungukuthi kwakunguNkulunkulu emisa uJesu njengomyalezo wakhe wokugcina, nokungukuthi; uMose wayemele okhokho, uEliya emele abaprofethi, uNkulunkulu wayefakaza ukuthi noma sebekuzwile ukukhuluma kokhokho nokwabaprofethi, manje mabazwe iNdondana, kwazise iyona engumyalezo wokugcina. Lokhu kufakazelwa umbhali wamahebheru (kumaHeberu 1:1), uNkulunkulu wakwenza kwaba kanye, asiphindanga sakubona kwenzeka futhi, uma kuphinda kwenzeka kuyobe kusho ukuthi uNkulunkulu uthuma omunye umprofethi ongcono kunoJesu, kodwa siyazi ukuthi akekho omunye ongcono kunaye. Okwesibili okungesilo iqiniso ngalencazelo ukuthi abafileyo babuya njengezingelosi ukuzokhuluma, izingelosi zazinomsebenzi munye ezaziwunikiwe, ukukhuluma okukaNkulunkulu kuphela, zazingakaze zifike zithi zilambile noma ziyagodola, ngaphandle kwalokho-nje uJesu ukhuluma ngokuvuka kwabafileyo okuyokwenzeka mhla ebuya kuMathewu 22:30, akakhulumi ngokuvuka okwenzekayo manje, lokhu kufakazelwe kaPawuli kwincwadi yamaThesalonika yokuqala 4:13-18.

Umbuzo usamile-ke ukuthi yini pho le abasuke beyiphupha noma beyibona labo abakholelwa emadlozini? Ezikhathini eziningi kuvamile ukuthi njemaKhristu sibekwe icala lokuthi sibiza abantu abafileyo ngamademoni. Impela uma uzokhuluma nabantu abakholelwa emadlozini kumele ubacacisele ukuthi awubizi abantu bakubo ngamademoni, ekuqaleni kwalombhalo ngike ngathinta kancane ukuthi ithini inkolo yobuKhristu ngabafayo, kucacise lokho ekuqaleni enkulumeni yakho, ukuthi akekho umuntu okwaziyo ukubuya kwabafileyo, ofileyo usuke esendaweni eyodwa phakathi kwezimbili, iHayidese noma IParadise, lokhu kuya ngokuthi ubekholwa yini kuJesu eyiNkosi nomsindisi wakhe. Uma usukucacisile ukuthi akukho obuyayo ngaphesheya kwethuna ilapho-ke ungaya emibhalweni ukuveza ukuthi lithini izwi ngemimoya ekwazi ukuxhumana nabantu.

Mina ngingagqugquzela ukuthi uqale kwiTestamente elidala ukubavezela ukuthi amadlozi ayakwazi ukwenza izinto zenzeke ngempela, ayakwazi ukwenza amalumbo, ayakwazi ukwenza nemilingo futhi, ungalenzi iphutha lokuphika ukuthi anamandla (2 Izikronike 33:6), bakhombise futhi ukuthi ukukhonza amadlozi kufaniswe kwalinganiswa nokukhonza izithombe ezwini leNkosi (AmaHubo 106:28-29), bakhumbuze futhi ukuthi ukukhonza izithombe kuphikisiwe yi-Zwi leNkosi, kuyisinengiso phambi kukaNkulunkulu (uEksodosi 20:3-5).  Bakhombise ukuthi lithi izwi amandla okwenza izimangaliso bawathathaphi, ngoba Kuyacaca ukuthi abawathathi kwabafileyo kwazise abanakubuya babe nezingxoxo nathi, lokhu kusho ukuthi futhi namaphupho asuke ephushiwe awaqhamuki kubona ngokunjalo. Kulapho-ke ungabayisa kwabaseKorinte bokuqala 10:18-22 ukuchaza ukuthi uNkulunkulu uthi amaphupho nemicimbi eyenziwayo isuke yenzelwa bani kahle kahle, kwazise abafileyo abanakudla, abanakuphuza futhi. Impela sivezeliwe kaningana ukuthi amademoni ayakwazi ukwenza imimangaliso, ayakwazi nokuzifihla aziveze njengengelosi yokukhanya (II kwabaseKorinte 11:14), amaphupho wona avela ngenxa yokusaba okufakwe kubantu ngokuthi abaphansi bamdinelwe, ulwazi oluyilo ngebhayibheli lizokukhombisa ukuthi lokhu akusilo iqiniso, “uthando lwabo, nomhawu wabo, nokuzonda kwabo sekuphelile” (Umshumayeli 9:6). Uqinise-la ekutheni awubizi asebefile ngamademoni, kodwa uveza ukuthi abanakukhuluma namuntu, kukodwa okuveziwe okukwaziyo ukukhuluma nabantu, imimoya emibi. Odinga ukusinda kuyona ilowo oyobalekela kuJesu athembe yena yedwa ngensindiso yakhe.

uNkulunkulu ovezwe yimibhalo kasiye umvelinqangi.

kafushane nje, uma ubheka indlela achazwe ngayo umvelinqangi uyabona usakude ukuthi kafani nakancane ngoNkulunkulu ovezwe yimibhala engcwele, ngenxa yokusaba ukuphuma esihlokweni ngizobalula kube kunye nje, umfundi usengahamba ayokwenza ucwaningo olunye mayelana nomvelinqangi, nanokuthi uhluke kangakanani kunoNkulunkulu ovezwe yimibhalo engcwele. Igama lika mvelinqangi lisivezala ngokusobala ukuthi unemvelaphi, wavela kuqala. Kepha siyazi ukuthi uNkulunkulu wemibhalo akavelanga wayevele ekhona (ngokukaJohane 1:1). Lokhu kukodwa kuyasivezela ukuthi asikwazi ukubiza uNkulunkulu ongcwele ngaleligama, alimvezi ubunjalo bakhe. Ngizothanda ukuvala ngalamazwi amafushane; lowo othi uthanda uNkulunkulu umelwe ukudela konke alandele yena, akanalungelo lokubambelela emasikweni aphinde abambelele kuNkulunkulu, kumele adedele kube kunye, abambelele kulokho okunye akukhethileyo. Kungumkhuleko wami ukuthi uNkulunkulu ambusise lowo ofundayo, amvule namehlo amyise eNdodaneni yakhe ephilileyo engu Jesu Kristu, iNkosi nomsindisi wethu. Amen.

• March 2016
  • Mar 7, 2016 Kungani umKhristu kungamele akholelwe kumadlozi? Mar 7, 2016
  • Mar 7, 2016 Does the doctrine of predestination discourage prayer? Mar 7, 2016
  • Mar 7, 2016 Kuyini ukuhlehla Mar 7, 2016
  • Mar 4, 2016 Sivumelekile yini ukukhulekela izoni?KUNGABE KUYIPHUTHA YINI UKUPHINDAPHINDA AMAGAMA UMA UKHULEKA? Mar 4, 2016

Does the doctrine of predestination discourage prayer?

Q&A
Prayer: knowing that God will do His will, and that he knows what we need, why is it necessary to pray? To put this question in another way: does the doctrine of predestination discourages prayer?

Lombuzo ubalulekile kakhulu kulesikhathi lapho khona abantu kunezinto eziningi abazikholwayo mayelana nomthandazo. Abanye bathi 'biza into oyifunayo uzoyithola', 'umthandazo ushintsha izinto' noma ' konke kuyenzeka ngomthandazo'. UJohane usitshela okuhlukile, ' 14 Yilesi sibindi esinaso kuye sokuthi, uma sicela utho ngokwentando yakhe, uyasizwa. 15 Uma sazi ukuthi uyasizwa noma sicelani, siyazi ukuthi sinakho esikucelileyo, esikucele kuye.'~EkaJohane 5. UJohane usitshela ukuthi kunentando kaNkulunkulu ngale kwemithandazo yethu.

Umbuzo omkhulu uthi njengoba uNkulunkulu wamisa zonke izinto ezizokwenzeka futhi akukho okwenzekayo ngaphandle kwalokho uNkulunkulu akumisa ngaphambilini, pho siyini isidingo somthandazo?. Efesu 1:11' kuyena esabelwa futhi ifa kuye, esakumiselwa ngaphambili ngokwesimiso salowo osebenza izinto zonke ngokunquma kwentando yakhe,'. Futhi akekho ombonisayo uNkulunkulu nongamshintsha umqondo, ngisho imithandazo yethu ayikwazi ukumshintsha kulokhu akunqumile ngokwentando yakhe, ' Ngokuba “ngubani owawazi umqondo weNkosi na? Nokuba ngubani owaba ngumeluleki wayo na?” ~Roma 11:34.

Umbuzo uthi yingani kumele sithandaze? Omunye angathi, sithandaza ukuze samukele lokhu esikucelayo kuNkulunkulu, lokho kungaba esinye sezizathu sokukhuleka kodwa akusona izizathu esimqoka. Umkhuleko awukho mayelana nomuntu ngaphezu kokuthi umayelana noNkulunkulu. Ngifisa sibheke izizathu ezimbalwa mayelana nomthandazo.

KOKUQALA
Okokuqala nokuyikho okubaluleke kakhulu, uma sithandaza uNkulunkulu uthola udumo noma uyahlonipheka njenga noNkulunkulu. UNkulunkulu ufuna sihlezi sazi ukuthi ungo  "ophakamileyo nophezulu, ohlala kuze kube phakade,"~Isaya 57:15. Uma sithandaza ukuze kube  khona abasindiswayo, uNkulunkulu usuke efuna sazi ukuthi" Ukusindiswa kukuye uJehova"~Jona 2:9
*Emthandazweni sidumisa uNkulunkulu ngaphezu kokuthi sisuke sicela, okuyinto uNkulunkulu ayifunayo. Ngomthandazo sicela umusa kuNkulunkulu, sethembe ubuhle bakhe, intando yakhe, ukungaguquki kwakho, ukubusa nokuphakama kwakhe, icebo lakhe  futhi sizithoba kwintando yakhe ngalokho uNkulunkulu uyadumiseka.
*Umkhuleko ukhazimulisa uNkulunkulu, lapho sikhombisa ukuncika okuphelele kuye, futhi sethemba ukuthi zonke izipho ezinhle zivela kuye owenzile izulu nomhlaba ngalokho uNkulunkulu uyakhazimuliseka.

OKWESIBILI
Okwesibili emkhulekweni ilapho sicela izinto esizifunayo kuNkulunkulu. Ilapho sibakhona nombuzo othi 'uma uNkulunkulu emisile zonke izinto ezizokwenzeka ngaphambi kokusekelwa kwezwe', pho sikuphi isidingo somkhuleko? Uma kuyiqiniso ukuthi, " Ngokuba konke kuvela kuye, kukhona ngaye, kuya kuye; makube kuye inkazimulo kuze kube phakade. Amen."~Roma 11:36, pho siyini isidingo somkhuleko? Umthandazo awusiko ukutshela uNkulunkulu izinto angazazi, " uYihlo uyakwazi enikuswelayo ningakaceli kuye."~Mathewu 6:8  kodwa emthandazweni ilapho sazisa(acknowledge) khona uNkulunkulu, ukuthi unguNkulunkulu owazi konke, nomise konke ngokwecebo lakhe. Umbuzo usamile njengoba uNkulunkulu emise zonke izinto ngaphambili futhi zonke izinto zenzeke ngokwecebo lakho, pho  siyini isidingo somkhuleko? Impendulo eqondile ukuthi sithandaza ngoba uNkulunkulu usiyale kanjalo, " khulekani ningaphezi;"~1Thes 5:17 futhi " bamelwe ukukhuleka njalo, bangadangali."~Luka 18:1. Izwi lisivezela ukuthi" Umkhuleko wokukholwa uyakumsindisa ogulayo" nokuthi " Umkhuleko oqinileyo wolungileyo unamandla kakhulu."~EkaJakobe 5:15,16. UJesu isibonelo sethu kwizinto zonke, nakube wayenamandla phezu kwakho konke, kodwa wazinikela ekukhulekeni, lokho kusho lukhulu mayelana nomkhuleko kodwa akuwuphenduli ngokuphelele umb wethu.

Asikugcizelele ukuthi umkhuleko awumenzi uNkulunkulu ashintshe umqondo wakhe mayelana nalokhu azokwenza. uNkulunkulu umisile zonke izinto ezizokwenzeka, nezindlela ezizosetshenziswa ukuze lezozinto zenzeke. uNkulunkulu ukhethile abantu abazokusindiswa(Efesu 1:3), waphinde wamisa ukuthi bayakusindiswa ngokushunyayezwa ivangeli(Efesu 1:13& Roma 10:13-17). Njengalokho ivangeli liyindlela uNkulunkulu asindisa ngayo abakhethiwe kanjalo ezinye izinto zimiswe ukwenzeka ngomthandazo. Izibonelo: nakuba u Eliya wayazi ukuthi imvula izakuna kodwa lokho akumvimbanga ukuthi akhuleke(Jakobe 5:17,18). UDaniyeli wayiqonda incwadi yomprofethi nokuthi kwakunini ukukhululwa kwabo kodwa lokho akumvimbanga ukukhuleka(Daniyeli 9:2,3). uNkulunkulu watshela umprofethi uJeremiya ukuthi, " Ngokuba ngiyazi mina imicabango engiyicabanga ngani,” usho uJehova, “imicabango yokuthula kungengeyobubi ukuba ngininike isikhathi esizayo nethemba."  kodwa ngemuva kwalokho waphinde wabayala wathi "Niyakungibiza, niye ukukhuleka kimi, ngiyakunizwa"~Jeremiya 29:11,12

Ngalokhoke, umi kanjalo umkhuleko, ayi ukushintsha intando kaNkulunkulu kodwa ukuthi intando yakhe yenzeke ngesikhathi asimisile, nangendlela ayimisile yena. Ngokuba uNkulunkulu kunezinto azimisile, lokho kufanele kusenze ukuthi sithandaze ngethemba nesiqiniseko. Kuyintando kaNkulunkulu ukwenza intando yakhe, esebenzisa imithandazo yethu. Nakuba uJesu wayazi ukuthi uzophakanyiswa ngokufa kwakhe nokuvuka kodwa uyathandaza uthi, " manje-ke ngikhazimulise wena Baba, kuwe uqobo, ngenkazimulo ebenginayo ngikuwe, izwe lingakabikho."~Johane 17:5.

Ekugcineni, kumele sazi ukuthi uNkulunkulu akashintshi, uma into ethi uzoyenza akashintshwa nayimithandazo yethu emide yenyembezi, " Wayesethi uJehova kimi: “Noma bekumi phambi kwami oMose noSamuweli, inhliziyo yami ibingebe kulaba bantu; balahle ebusweni bami, baphume."~Jeremiya 15:1. Ungakhumbula nokuthandaza kaMose ukungena eKhenana ukuthi waliwa nguNkulunkulu. Imicabanga yethu ngokuthandazo kumele ihambisa nalokhu okufundiswa yizwi leNkosi. Ebesikwazi ukuthi uma ngike ngathandaza nakanjani izinto zizokwenzeka, lokho kuwukungamhloniphi uNkulunkulu, nokumenza inceku, ekutheni wenza noma yini esiyicelayo noma ingekho ecebeni lakhe. Uma sithandaza sisuka sicela kuNkulunkulu esikufunayo bese siphumula ecele lakhe, ilowo umthandazo ophakamisa uNkulunkulu wehlise umuntu. Umthandazo uhlonipheka kuNkulunkulu uma emoyeni wami ngithi "makwenzeke intando yakho Nkosi". Okusho ukuthi uma uNkulunkulu esuke ephendula imithandazo yethu, akusiko ngoba imithandazo yethu inamandla okushintsha uNkulunkulu kodwa ingoba kusuke kusecebeni. Yini kumele sithandaze? uNkulunkulu umise umthandazo ukuthi ibe  yezinye zezindlela enza ngayo intando yakho.

Sesivala ngifisa sichaze ama verses kwi bible ekungenzeka asishiye sinemibuzo. 
1 Eka Johone  5: 14 Yilesi sibindi esinaso kuye sokuthi, uma sicela utho ngokwentando yakhe, uyasizwa. 15 Uma sazi ukuthi uyasizwa noma sicelani, siyazi ukuthi sinakho esikucelileyo, esikucele kuye. 
Umthandazo oyiwona, ilapho khona umqondo kaNkulunkulu uhambisa nomqondo wethu, lokhu uNkulunkulu afuna ukukwenza kuyilokhu esikufunayo, ilapho kusuke kuhlangana khona amandla kaNkulunkulu nemikhuleko yabazalwane.

Johane 16:23 " Ngiqinisile, ngiqinisile ngithi kini: Lokhu eniyakukucela kuBaba egameni lami uyakuninika khona."
Njengoba sazi ukuthi akukho ukuphikisana kwizwi leNkosi, ngalokhoke  siyazi ukuthi lamazwi ahambisana nalawo kaJohane "ukucela ngokwentando". Kuyini ukucela engamini likaJesu? Ukucela egameni likaJesu, ukucela lokho okuhambisana nemvelo kaJesu noma nalokho ayikho uJesu. Ukucela egamini lika Jesu, ukucela lokhu uJesu abezokucela uma bekuwuye othandazayo noma uma singayibeka ngenye indlela, kuwukushiya intando yethu sicele ngokwentando kaNkulunkulu.

Kuyini ukuhlehla

Musa Nzimande

Yini ukuhlehla na? Kulula, uma umuntu ubesohambweni olubheke phambili abese eqoma ukungajiki afulathele uhambo kodwa ebe ebuyela emumva ngezinyawo: lokho kungukuhlehla. Uma umzalwane ebekholwa elangazelela, futhi ekhula Ku Christu Abe eseqoma ukungajiki afulathele ukukholwa kodwa ngezenzo angakhuli ekumesabeni uNkulunkulu nase bungcwekeni singasho ngokuphelele ukuthi uyahlehla. 

Njengesitimela kumbe imoto emugwaqweni ekungenakubuyelwa kuwo emumva, uma isitimela kumbe imoti kungayi phambili futhi kungamili kusobala kuyahlehla. Njengalokhu sikuyi inkolo yobu Khristu abaningi abafuni ukubuyela ezonweni kucace kuwo wonke umuntu ukuthi bakuzo kodwa bama kuwo umgwaqo wikukholwa kodwa bangayi phambili kunalokho babuyele emumva kodwa bebheke phambili. Sikubiza ngesilungu ukuthi “Backsliding”. 

Asithole ukuthi Inkosi Nkulunkulu ithini ngezwi layobngalokhu
Izaga1

32Ngokuba ukuhlehla kwabangenalwazi kuyakubabulala, nokunganaki kweziwula kuyakubabhubhisa.
33Kepha ongilalelayo uyakuhlala elondekile, agcineke, angabi naluvalo ngokubi.” 

Kulencwadi sithola ukuthi ukuhlehla kwakhiwa ukungabi nalwazi okungukwenziwa ukungamulaleli uNkulunkulu. Lesi senzo ngokwezwi lika Nkulunkulu kunemiphumela emibi: 

Umphumela wokuqala ukubhujiswa: yini ebhubhisa umuntu kulokhu? Lithi izwi indlela abayithathile iyo ebabhubhisayo. Njengemoto erobhothini uma ihlehla izithela engozini. Uma uhlehla kuNkulunkulu uzithela kukho okungemva kwakho Usathane osilandela mihla namalanga. Uzithela ekwahluleleni umuntu abesedlulile kukho NGO Khristu uJesu ngokukholwa kuye. Uma umuntu ehlehla ubuyela enkambweni yakhe yakudala abesedlulile kuyo emuyisa esihogweni. Buyani ekuhlehleni nibuyele kuNkukunkulu. 

Okwesibili lithi izwi ukuhlehla kudalwa ukunganaki. Ukunganaki ukumesaba uNkulunkulu, ukumlalela nokumkhonza ngenhkiziyo emhliphe. Nakani okwaphezulu lapho uKhristu ekhona, ninganaki okusemhlabeni (Kwabasekolose 3:2). Ukhristu uphezulu ebungcweleni nenkazimulo umhlaba ungemumva nenkanuko namanyala. Thina simelwe ukunaka okusenkazimulweni ubuhle nobungcwele. Sikhohlwe izinkanuko zenyama namanyala okusemhlabeni. 

Ubungizi besibili bokuhlehla kuvela ekunganakini. Uma ubuka izaga 1:17

Ngokuba inetha lenekelwe ize emehlweni azo zonke izinyoni.
Uma unganaki unjengenyoni endiza ize iyokhungeka enethini elibekwe emhlabeni ukubamba izinyoni zonke ezinganaki. Kulendaba inethi libekwe njengento ecushelwe bonke abahamba ngokunganaki bewela esilingweni isishonisayo nesibhubhisayo, lokho kubadonsela esihogweni ngenxa yokuhamba ngokunganaki. 

Bazalwane inkosi yasiyala ngokuhamba ngokunganaki nanjengabayiziwula
Kwabase Efesu 5

14Ngalokho uthi: “Phaphama wena oleleyo, uvuke kwabafileyo, uKristu uzakukukhanyisa.”

15 Ngakho-ke bhekisisani ukuthi nihamba kanjani, kungabi njengabangahlakaniphile kepha njengabahlakaniphileyo,

16nithengisise isikhathi, ngokuba izinsuku zimbi.

17 Navigo ningabi yiziwula, kodwa qondani okuyintando yeNkosi.

Qaphela, Nakisisa okwenzayo inkosi iyeza futhi iyabuka ukwenza kwakh0.

Ungabe thina kusifanele yini ukuhlehla? 
Kumaheberu 10
38kepha olungileyo wami uyakuphila ngokukholwa; kepha uma ehlehla nyovane, umphefumulo wami awunakuthokoza ngaye.

39 Kepha thina asisibo abokuhlehlela ekubhujisweni, kodwa singabokukholwa, kuze kube ngukusindiswa komphefumulo.

UYABONA Na! Thina asisibo abokuhlehla futhi inkosi ayithokozi nakancane ngabahlehkayo. Ngakho yekela ukuzikhohlisa, HLUKANA nokuhla ngoba INKOSI IYABUYA futhi IYABUKA.

Sivumelekile yini ukukhulekela izoni?KUNGABE KUYIPHUTHA YINI UKUPHINDAPHINDA AMAGAMA UMA UKHULEKA?

Nqobile 3: Q & A
Can we pray for sinners? What if they are not elect? Is repetition wrong. 

Lemibuzo ngingathanda ukuyiphendula ngisuka ngemuva ngiya ngapgambili. 

KUNGABE KUYIPHUTHA YINI UKUPHINDAPHINDA AMAGAMA UMA UKHULEKA?

Impendulo ecacile ithi YEBO. Ngikusho lokhu ngoba iNkosi uJesu ike yakhuluma ngalesisenza ku Matthew 6:7-8 (kodwa nxa nikhuleka ningathemelezi njengabezizwe, ngokuba bathi bayakuzwiwa ngokukhuluma kwabo okuningi). Uma sikhuleka kufanele sisho sikhuleke njengoba iNkosi ifundisile ku (Matthew 6:9-13).

Umbuzo 2. 
KUNGABE SINGAZIKHULEKELA YINI IZONI? UMA KWENZEKA UKUTHI AZIKHETHWANGA?

Uma singabazalwane kufanele sihlale sinxanele ukuthi abantu baphendukele eNkosini. Kungabe sisenayo yini intshisekelo eyahlupha omunye wama Reformers angaphambili ubaba u George Whitefield? Owathi " Nkosi uma ngingasaphileli ukulanda imiphefumulo, thatha owami umphefumulo"

Nobaba uJohn Knox owathi "uma lingasaphenduki izwe lakithi e Scottland, thatha owami umphefumulo Nkosi". Ukukhetha abantu kungokuka Nkulunkulu, kanti futhi thina sinikiwe ilungelo lokucela konke okusentandweni kaNkulunkulu. Kungabe kuyintando kaNkulunkulu ukuthi abantu basindiswe?

1 Timothy 2:3-4 iZwi liveza ukuthi uNkulunkulu uyathanda abantu bonke basindiswe bafinyelele ekulazini iqiniso. 2 Peter 3:9 iNkosi ayifuni abantu babhubhe kodwa beze ekuphendukeni. Ngakhoke uma sikhulekela abangakholwa sikhuleka ngentando jaNkulunkulu. Kusho ukuthi kufanele sibakhulekele.

UNkulunkulu nguye owamisa konke, wakhetha abantu ngaphambi kokusekelwa komhlaba( Ephesians 1:4). Ukukhetha kusecebeni lakhe, alukho uphawu olubekwa kwabakhethiweyo olungaphandle ukuze ukwazi ukubabona. Uma unovalo lokuthi ungaba necala lokuthandazela umuntu kant akakhethiwe, kangakanani kunokuthi ungathandazi kanti uNkulunkulu umkhethile. 

Kungabe uNkulunkulu usindisa labo esibakulekele bodwa yini? Cha, nakanye kodwa uNkulunkulu uyayisebenzisa imikhuleko yabazalwane ukuze afeze icebo lakhe. Kungani uNkulunkulu ekhetha abantu? 

1. Ngokuba kuhle kuye (Ephesians 1:4-5)
2. Ukuze aveze amandla akhe (Romans 9:22)
3. Ugqugquzelwa ulwazi lwakhe lwangaphambili (foreknowledge) ( Romans 8:29)
4.  Ngothando lwakhe olukhethekileyo ( 2 Thessalonians 2:13). 

Ngakhoke ukukhetha kungokuka Nkulunkulu, thina sifanelwe ukubakhulekela abangakholwayo njengeNkosi yabakhulekela esiphambanweni (Luke 23:34) (John 17) noStefanu wabakhulekela ukuba isono sabo sokumkhanda ngamatshe singabalelwa kubo.

Ukucacisa kabanzi, ukuphinda umkhuleko akulona iphutha kodwa ukuphindwa phindwa kwamagama emkhulekweni kuyiphutha. UJesu siyambona ephindaphinda umkhuleko eGetshemane. Kanye no Phawulu ekhulekel iva enyameni. 

Kodwa ukuphindwa phindwa kwamagama ayize kuyiphutha